BY
ISYAKU BALA IBRAHIM
Caba (chapter one)
Cincin yi Konbeke Zawangi
Tacin bagi be nyizagi wunjin ekun à, cincin gá wun yi ò. Fafan na de edzutá gán na wungá yi fafan cincin ò. Èkace gbángbán nyá zawangi kinkpátá ò gá yi ebalo cincin ò. Acinga enyajin na sagwa kudozhi gán na gá yi yèkpa to egun zawangi na à zhe èmì-èdzú cincin na, na tako ù bo gá yi kpatsunta den to nin nyá wun na. Nyana de egankpé kawonyi eba zawangizhi bo à na gá yi cincin ò. Ekándoro e la vwaya bedzo a ce be de janyi ù, tosun, wun zhe nyana è zo nyi kpe harilonyi na à, ce gikáya na, be gácibó to énában ù wunjin nyana ye navo wó na à. Cincin yi enyasusóci na yi tanganná na à bagi to nyizagi makezhe a ci à zhe nìní na. Ebwacin, be nakangbàn tetengi nyi wun è la èkinni woncinko bé nyi. Woma gá kò gun èsán ù bo à ni, kanga konbeke wuwayé ù ca ò. Tswitswanni ù gá ketó, wunci gá kpànkòrò na à lu ù na fin gbannyi, wunci à fe pá rayi ù lo eba tsutsu ko èsà. Kila nyana ètàn cincin kan na eká wuncin gá nyá ezandoci na ù won na è ná ò nyi ò? Wo zhi ù yi ò na yi be cincin na ci be à cincin ndoci zhebu na ò ci wa wun kati ò na ò? Wawa! Ezanazhi à kó wun cincin ò. Nin nyá cincin ò, wawa bagizhi yi ò. Be a de cincin na à de cin babo à na à.
Gbani, wun à yi nana gá yi konbeke nyá eza na à kó na ò, ki à lili jin ‘cincin’ na gá sagwa kun egifunfuru na ò, na bawú ù gán nakansán gbwugi na à? Ekpangba ù zhi; tsobanyi, katunbonyi, wondannyi, be yèkpanyi a jin èkàce kpokizhi à. Éyékanzhin wò ya enya nyá ù shegwa à. Egunnin nyá gbarufu la kó na wun à go esungán cincin wó na à. Kagbó cincin è la ma enya kezhe wunci è la zhe kàrà na. Cincin jin nyá egifunfuru à amá a fe wó sansan ù ebó zawangibó à bo.
Cincin titi guta ù yi ò: cincin Sòkó, cincin yegi be cincin na dan tacin bagi be nyizagi ò na. Nyana yi ye baza eti ù bo babo nana ò na, gá yi cincin bagi be nyizagi na gbaketenyi wun è zo zo fi cin bedzo yawojin ò na, efo nanazhi ò na. Nin nyi ù bo, yi à ganganzhi eti kemina zawangi yi na, tabiya cin, sharyafu ù zhi, enyagagizhi cin be éyékpé cin nyi.
